Зубунь гимназияса мокшень кяльть тонафнесазь омбоце клазста сявомок сисемцети молемс (В Зубово-Полянской гимназии мокшанский язык изучают со 2 по 7 класс) МОКША

Зубово-Полянскяй гимназиясь панчф ёфси аф кунара – кафта тёжятть кафксоце кизоня. Пуроптф сон райцентрань омбоце школать видеса. Аф ваномок нюрьхкяня историянц лангс, тяса лама тиендеви образованиянь сембе ширева. Эряви азомс, педагогическяй коллективть и шабатнень оцюфт сатфкссна кода научнай, стане и творческяй работаса.
Башка васта гимназияса занци мокшень кяльти тонафтомась. Тяса вов ни лама кизот покоди мокшавась Александра Белкина. Сон сембе виензон и содамошинзон макссесыне иттненди. Шабатне оцю мяльса тонафнесазь мокшень кяльть. Учительсь эрь урокти аноклай мезе-бди одня. Сонць луви иттненди стихт мокшень и рузонь кяльса республиканьконь колга, шнакшнесы тядянь-алянь кяльть. Шабатне содайхть лама мокшень морот, сиде моронят. Няеви, учительсь машты крьвястемс тонафнихнень сельмоса цятконя, минценнети кельгома.