«Живописная графика» невтема (эрзя)
Мордовиянь республикань Степан Эрьзя лемсэ изобразительной искусствань музейсэ течи 16 чассто панжови рузонь артыцянть Вадим Дмитриевич Фалилеевень 145 иетненень алтазь «Живописная графика» лементь ало невтема. Сон седе парокс ловсь эрьва кодамо тюссо ды раужо-ашо гравюрань техникасо важодеманть, совавтызе искусствас шкинемань од лувонть. Юбилеень невтемасо анокставить искусствань 30 ламо произведеният, малав весе теезельть революциядо икеле.
Неть важодевкстнэ ускозь Россиява ды Чивалгомань Европава ардомсто. Экспонаттнэнь ютксо – се шкане эрицятнень портретт, сокицянь-видицянь эрямонь ды тевветямонь невтемась, тиринь пертьпельксэнь мазычись, истяжо кезэрень шкань архитектурань тевкадовкст. Теезь сынь графикань эрьва кодат техникатнесэ – артовкссто саезь кшнисэ, линолеумсо, кевсэ ды чувтосо гравюрас. Вадим Фалилеевень лемесь Мордовиянь культурань содавикс представительтнень ютксо ашти неявикс таркасо. Степан Эрьзянь, Федот Сычковонь, Иван Макаровонь произведениятнень коллециятнень ютксо сонзэ графикань важодематне аштить музеень каштанчикс. Артыцясь чачсь Пензань губерниянь Маис велесэ. Тетязо, Дмитрий Фёдорович Фалилеев, служась ошонь ды Саранонь уездэнь земской управань прявтокс.