Юрхтавась» васьфтезе эсь юбилейнц. («Юрхтава» встретила свой юбилей) МОКША

Саранск ошса национальнай драматическяй театраса ётафтовсь ила, коза пуромкшнесть республикань мокшень аватне. «Юрхтава» ассоциацияти топодсь комсь киза. Тя пингста общественнай организациясь мольфти оцю тефт республиканьконь эряфса. Синць ассоциациянь мокшаватне нолдазь эсь смузьснон и асушиснон, штоба илась лисель мазыста, мялень салайкс-афкуксонь праздникокс. Театрать фойесонза и залсонза цифтордсть мокшень авань мазы щапне. «Юрхтавать» сюролданза ёряфт республикань сембе мокшень районга. Сяс эрь аймакста сафт делегатт тяфта жа эсь лацонь щамснон мархта. Перьфпяле кайгсь музыкась, аноклафоль декоративно-прикладной искусствань выставка. Азоравать Зинаида Акимовать таколдсь седиец, эрявсть васьфтемс инжихнень и сембось мяльс коре лисель арьсефть коряс. Васень шистокиге, кодак кочкавсь-пуроптовсь «Юрхтава» ассоциациясь, мокшаватне илештень кятть кярьмодсть оцю тефненди. Апак решандак, таколфты кизефкста эряфсонк васьфневи пяк лама, а ся кизотнень, мзярда тя общественнай организациясь кочксесь вийхть, эздост ульсь пефтома. Эстокиге ушедсть мольфтема оцю работа кяленьконь, культураньконь, коеньконь-обуцяньконь ванфтомаса и кемокстамаса. «Юрхтавась» кирдьсы ширеснон, коза саты виец, лезды мокшаватненди. Кирди кеме соткст власттнень мархта. Тячиень шити аватнень кядьвельде тифта пяк лама и сави нинге тиемс сяда оцю тефт. Сяс ассоциацияв сувафтовсть одонь эрьгат. Марса сяськовихть инь стака сталмотне.