Йовлань Олонь лемсэ этно-кудось веши лезкс. (Этно-дом В. Ромашкина нуждается в помощи) ЭРЗЯ
2006-це иень таштамковонь 6-це чистэ Владимир Иванович Ромашкинэнь чачома чистэнзэ Вирь Тавла велесэ панжозель «Этно-кудо» музеесь. Эрьва ие, те таркасонть ине фольклористэнть, музыкантонть, кинодокументалистэнть лемензэ кундамга ютавтови «Торамось терди» музыкальной фестивалесь. Йовлань Оло, истямо лем кочкакшность эстензэ «Торама» ансамблянь пурныцясь. Коллективесь нейгак полады ушодозь тевенть. А Йовлань Олонь лембензэ вансты этно-кудось. Музеев паро мельсэ сыть эрьва ёндо ломанть, васняяк паряк секс, што тесэ свал вастыть седейшкава ды те таркась кармась улеме оймень ды мелень ванстома таркакс. Омбо мастортнэсэ ды лия регионтнэсэяк прявтнэ умок бажить ванстомс тиринь культуранть. Ансяк неть валтнэ а кандовить те таркантень. Этно-кудонть икеле улить течинь чинтень стакачить, конат топавтовить музеень важодиятнень кедьсэ. Ды кода карминек содамо- те пек а саты-эряволь бу лезэ покш ломантнень пельде, но мекс-бути сынь те лезксэнть максомо а капшить.
Музеенть улить ламо сыцят, свалшкане ютавтневить экскурсият, седе пек вишкатнень туртов. Келейгавтови музеень экспозициясь, ансяк экспонаттнэнь а косо ванстомс, таркась кадови овсе аламо. Асатыкстнэнь ды стакачитнень лангс апак вано этнокудось эри. Тувталокс тенень паряк ещё се тевеськак, што азоравакс тесэ алкуксонь эрзявась Раиса Васильевна Водясова, конась валдо мизолкссо ды кши-сал марто васты эрьва сыцянть. Таштамковонь 6-це чистэ таго гайгезеви Торамась Корчкурбуень моданть лангсо, сон пурнасынзе раськень коень ды моронь вечкицятнень ды ванстыцятнень масторонь эрьва ужинестэ. Теде питней мезеяк арась. Карматано кемеме, сёксентень лезксэсь музеень важодиятненень карми максозь.