Вышел в свет фотоальбом о Мордовии
Мокшэрзянь народть марстонь котоце пуромкссонза кепсевсть кяльхнень, культурать, койхнень-обуцятнень ванфтомаснон мархта сотф оржа кизефксне. Тячиень шить межрегиональнай общественнай организациянь ломаттне, сонь исполкомоц валом-валом сувафнесазь эряфс съездть решениянзон. Синь вийснон вельде нолдаф мазы альбом, кона азонды Россиянь лия нароттнень мархта марстонь цебярь тефнень колга. Фотоальбомть анокламаса и нолдамаса покодсь пяк лама ломань. Редакторхт, корреспондент, оцю путкс тянди тисть фотографне, эсь фотографияснон мархта азондыхть республикать эряфонц колга, няфневихть синь мархтост велень эряфсь, промышленностсь, культурась, образованиясь, спортсь. Эрявиксшиц тя питни книгать сянь эса, што сонь эсонза, васендакиге, ломаттне еразь няфтемс мокшэрзянь народть, сонь коензон-обуцянзон, историянц, культуранц марса Россиянь лия нароттнень мархта. И мезсь пара, ширеса эряйхне маштыхть ванфтома культурать, кяльхнень, а стак тов и синь сотнекшневихть Россиянь лия нароттнень культураснон, койснон мархта. Тяфтама цебярь тефнень эса оцюшка талекать фалу тиендьсы мокшэрзянь организацияц, сонь исполкомоц.
Республикасонк эряй лама национальностень ломатть. И эрь национальностсь музе эсь вастонц минь аймаксонк. Пяк пара, што сембе фкя-фкянь мархта эряйхть ладязь, марса ётафнихть эрь кодама илат, коса няфнесазь эсь щамснон, мороснон-кштимаснон национальнай ярхцамбяльснон и тя сембе цебярьсь касондоль и вииякшнель Россиять келес. Эряви азомс, мезе ётафневи минь республикасонк, ширеса эряй мокшэрзятнень эряфса, семботь мельге ваныхть и сермадыхть журналисттне. Сяс тя изданияти сувасть ламоц синь серматфсна. Альбомсь мусы эсь вастонц велень и ошень библиотекатнень эса. Пачкоди и ся мокшэрзятненди, кит эряйхть ширеса. Изданиять ули и электроннай вариантоц. Тячиень од технологиятнень вельде можна мумс сонь эрь уженяста.