Войнань ды трудонь подвигень мемориальной музейсэ ютась «Ни шагу назад!» интерактивной акциясь, конась алтавсь Сталинград ошонть кисэ тюремань ушодомантень (ЭРЗЯ)

Фашистнэнь каршо тюремасонть покш таликазо Сталинградонть кисэ тюреманть, конась мольсь 200 чить ды веть. Ошонть идесть 2 миллиондо ламо ломанть, 2 тёжат танкт ды 25 тёжат эрьва кодамо орудият. Те тюремась ловови войнасонть сехте стакакс ды астувтовицякс. Сон ушодовсь 1942 иень медьковонь17-це чистэ, ды мольсь 1943 иень даволковонь 2-це чис. 1942-це иень медьковонь 28-це чистэ Иосиф Сталин нолды Приказ «Ни шагу назад». Зяро те тюремасонть маштовсть солдатт, те шкас арась виде цифра.  Ломантне тюрсть эрьва куронть, эрьва кудонть кисэ. 1942-це иень эйзюрковсто Мордовиясто 600-до ламо од ломанть кучозельть тонавтнеме Орджоникидзэ ошонь военно-пехотной училищав. Кода ансяк ушодовсь Сталинградонть кисэ тюремась, сынь весе кучозельть тов. Ламотне маштовсть тюремань васень читнестэ. Но эрьвась эйстэст вакссонок семс, зярс эйстэнзэ ледстнить. Волгоградсо маштовозь геройтнень лемест ледстнемга уш 1968 иестэ стявтозель «Мамаев курган» покш мемориалось, конань куншкасо ашти мода-масторонь келес содавикс «Родина-мать зовёт!» кеврунгось. Раужо гранитэнь плитатнень лангс верде алов тешкстазь Сталинградонь кис тюрицятнень лемест ды фамилияст. Те тевесь те шкас апак прядо, эрьва ие спискатне поладовить.