Воинтнэнень-интернационалистнэнень васенце кеврунгось стявтозель Мордовиясо! (ЭРЗЯ)
Саран ошонь 29-це школанть вакссо ютась митинг, кона алтазель Советской Союзсо воинтнэнень-интернационалистнэнень васенце кеврунгонть панжомстонзо 30 иень топодемантень. Колмо тонавтомань таркань кадетт, образованиянь министерствань ветеранонь вейсэндявксонь, военной комиссариатонь представительть, ледстизь Афганистансо маштовозтнень. 1987 – це иестэ те кеврунгонть лангсо важодсть ламот. Проектэнь анокстыцясь – раськень просвещениянь отличникесь, школань военрукось Владимир Пережогин. Школань прядыцятнень марто вастовомадо мейле, прасть мельс кадомс ледстнема тешкс Афганистансо чавовозтнеде. Се шкане теемс те ульнесь аволь шожда. Теке марто муевсть ломанть, конат лездасть покш тевсэнть. 30 иеде теде икеле Владимир Костин ульнесь Пролетарской райононь военной комиссарокс. Соды мезе те истямось – ильтямс од ломантнень войнав. Афганистансо войнань прядовомадо кавто иеде икеле сон ульнесь сетнень ютксо, кить совавтызь историяс те мемориалонть. Монументэнть вакссо митингень ютавтомась аволь чуросто вастневиця тев. Цецят пурнавозтнень ды патриотизмадо стихть тонавтницятнень пельде. Советской ды афганской раськетнень ютксо кедень сювордамось – Советской Союзсо кармась воинтнэнень-интернационалистнэнень васенце кеврунгокс. Сонзэ теицятне тешкстазь весероссиянь историянь ды культурань ванстомань вейсэндявксонь дипломсо.