Военной ды трудовой подвигень мемориальной музейсэ ютась поисковой отрядтнэнь республиканской слёт. (ЭРЗЯ)
Прявт темакс кармасть 2016 це иень ды Рав кужонь федеральной округсо слётонь цётамотне. Теде башка республикань поисковой отрядтнэнь прявтнэ кортызь важодеманть сыця иес. 2016-це иенть перть Мордовиянь «Поиск» патриотической вейсэндявксось ютавтсь 16во экспедицият. Кепедезельть ды калмазельть 82 солдатт, муезельть 13 медальонт, вете боецтнэнь муезельть лемест. Поисковой экспедициятне ютавтозельть Калужской, Ростовской, Смоленской, Ленинградской, Тверской областнесэ ды Крым Республикасо. Кода тешкстызе «Поиск» вейсэндявксонь прявтось Николай Кручинкин, те промксонтень васенцеде састь республикань весе райононь отрядонь прявтнэ. Эряви тешкстамс РФ-со улиця поисковой отрядтнэнь ютксто Мордовиянсесь сех покш, сонзэ эйс совить 1300 ломанть. Экспедициятнеде башка, ютавтневить лекцият, семинарт, косо од ломантнень марто вастневить Ине Отечественной войнань участниктне, поисковой движениянь ветерантнэ, историктне, реконструктортнэ. Покш робота поисковой тевтнень коряс топавтыть музеень, боевой ды трудовой славань нупалень ветицятне, конат колмо ковс весть вастовкшныть те музейсэнть, кортыть экспедициятнеде. Нама, истямо вастовомасо кортавить сыця иень тевтнеяк. Саемга «Эхо войны» отрядонть туртов 2017-це иесь истяжо карми пек сюпав эрьва кодамо тевсэ. Тешкстасынек, поисковой отрядтнэс совицятне невтить пряст эрьва кодамо слётнэсэ-пелькстамотнесэ ды зярыяксть лиснесть изницякс.