«Вирьавань паламо». («Поцелуй богини леса») ЭРЗЯ
Истямо мазый лем ало эрзя-мокшонь раськень культурань музейсэ роботы Александр Наумовонь выставказо. Анокстамось сонензэ мольсь ламо иень перть. Авторонть те омбоце покш персональной выставка. Невтевить музейсэ сядодо ламо роботат. Скульптуратнень лангс ванозь, сеске неяви мастерэнть перть пельксэнтень вечкемась: ракшат, ломанть, чувтот-весе теезь мелень путозь. Важодемстэ тевс нолды килеенть, пекшенть ды сувеленть. Важодевкстнэнь ютксо покш пелькс саи православиянь тематикась. «Пазава», «Серафим Саровский» ды лия роботатне теезь покш вечкема марто. Эзь юта мастерэсь национальной тематиканть вакскаяк. Те парсте неяви фольклорной ды эпической сюжетнэсэ. Невтевить выставкасо кудоютконь тевтненень алтазь теевкстнэ. Выставкань панжома чистэ мастерэнть роботанзо ванномо састь ялганзо, тонавтницянзо. Покш питне сонензэ путсть профессиональной художниктне. Лембе валт ёвтасть МР-нь культурань ды туризмань министрань васенце полавтыцясь Николай Храмов, художникень вейсэндявксонь прявтось Александр Занкин, «Эрьмезь» чувто ланга керсицятнень вейсэндявксонь прявтось, народной мастерэсь Пётр Рябов ды лиятне. Эряви меремс шкинеманзо кисэ Александр Наумов казезель шнамонь конёвсо, а скульптуранзо аволь весть невтезельть кода республиканской, зональной истя и раськеютконь выставкатнесэ.