Вирь Тавлань эйкакшонь художественной школасо панжовсь «Иненармуненть тундонь морозо» выставкась. (ЭРЗЯ)
Эсест теевксэст выставкасонть невтить национальной культурань институтонь «Эрзя-мокшонь раськень кезэрень культурань ды неень шкань искусствань» кафедрань тонавтыцятнень студентнэ. Выставкасонть невтевить роботат, конатнень теизь меельце сисем иетнень перть декоративно-прикладной отделениясо тонавтницятне. Экспозициясонть невтевиця важодематнень вейсэнди нармунень образось. Раськень шкинемасо те сех сеедьстэ невтевиця образ. Тёжат иетнень перть нармунесь ашти ломанень вакссо, секс сонзэ пек сеедьстэ невтитькак эсест роботатнесэ художниктне, декоративно-прикладной искусствасо важодицятне. Тавлань эйкакшонь художественной школасо истямо выставкань невтемась теевсь паро коекс. Школань прявтось аволь ансяк тонавты керсемань тевентень национальной культурань институтсо, сон лезды эйкаштнэнень панжомс эрзянь раськень культурань ёнкстнэнь эйстэ вейкенть – керсеманть. Батик, чувтосто керсевкст, артовкст, викшневкст, керамика – весень вельде невтеви нармунень образось. Сонзэ те отделениясо тонавтницятне вечксызь седеяк пек. Весень туртов невтезельть оршамотне «Иненармунь» коллекциясто, конатнень стызь институтонь тонавтницятне. Дипломонь сех вадря важодевкстнэ аволь весть невтезельть Весероссиянь выставкатнесэ-пелькстамотнесэ, косо покш питне сыненст макснесть масторонь содавикс художниктне, дизайнертнэ. Выставкась карми роботамо медьковс. Пурныцятнень валост коряс, сонзэ невтьсызь чувто ланга керсицятнень симпозиумс сыцятненень, конань арсеви ютавтомс аштемковонь меельце читнестэ.