Вейсэнь важодемадо соглашения (ЭРЗЯ)
Ульяновск ёнксонь Правительствась ды Россиянь финнэнь-угрань раськень Ассоциациясь сёрмадсть вейсэнь важодемадо соглашения! Учови, истямо тевтопавтомась лезды виевгавтомс тиринь келень, культурань, раськетнень ютксо ояксчинь ванстомга ветявиця роботанть. Ёвтама, Ульяновск ёнкссо раськень политикась ветяви Россиянь президентэнть кармавтоманзо топавтомга ды 2025-це иес Российской Федерациянь государственной национальной политикадо стратегиянть мельс саезь. Общественной контроленть тень коряс ютавты 2006-це иестэ губернаторонть пингстэ пурназь Советэсь. Эряви ёвтамс, шабра регионсо эриця весе раськетнень коест ды культурась ванстомга топавтови ламо. «Региононь Правительствань ды Россиянь финнэнь-угрань раськень Ассоциациянть ютксо вейсэнь важодемадо соглашениясь сермадстозель васенцеде. Те пек эрявикс эскелькс, кона лезды ванстомс раськетнень ютксо ояксчинть. Ульяновскоенть те тевсэнть покш опытэзэ. Сон максома Россиянь лия регионтнэненьгак», — лови Ассоциациянь прявтось Пётр Тултаев. Покш невтевксэст тесэ тиринь келень тонавтоманть коряскак. Региононь ламо районтнэсэ 2классто саезь 9-цес молемс эрзянь келесь тонавтови кода предмет. Тежа сядо кодгемень кавто тонавницятне аволь ансяк кортыть эрзякс, но и седе домкасто содавтовить минек сюпав культуранть марто. Те невтезель панжадо он-лайн уроконть коряс, кона ютавтозель 40-це номер лицейсэ. Раськенек культурантень мельявоманть виевгавтыть истят покшчитне, кода «Шумбрат», «Масторавань морот». Ульяновскойсэ нолдави «Ялгат» газетась. 16 иеть роботы эрзя-мокшонь национально-культурной автономия, конань прявт путовксозо – ванстомс ды кандомс сы шканть раськетненень прявт сюпавчинек. Лезкс максыть теньсэ гранттнэ, саемга меельцесь- «Шумбрат, потмо вал». Россиянь финнэнь-угрань ассоциациянь заседанияс 19 регионсто пурнавозтне тердезельть Симбирской губерниясо чачозь содавикс ломантнень галереяв, косо НКА арсеманзо коряс панжовсь э/м раськень представителенть, велень хозяйствань наукань докторонть, профессоронть, Ульяновск ёнксонь почётной гражданинэнть Николай Немцевень портретэзэ.