Весероссиянь вирень путома чи. (ЭРЗЯ)
Эрьва ие панжиковонь омбоце субутасто тешкстави Весероссиянь вирень путома чись. Тешкстыть сонзэ Мордовиясояк. Саранскоень вирень ванстыцятне тедиде те акциянть ютавтызь Сыре Шайговань районсо, косо пижелгавтызь Од Акшинасо улиця иневанькс лисьмапрянть. Покшчись Россиясо тешкстави зярыя иеть. Весе, кинь ули мелезэ мазылгавтомс кудонть маласо тарканть, те чистэнть мереви путомс чувтот. Кода кемевтимизь Саранскоень вирень ванстыцятне – коесь ульнесь умонь шкатнестэяк. Ней полавтовсь ансяк лемезэ. Тундось-шка, зярдо вирень ванстыцятненень сави роботамс кавксть седе ламо. Васняяк, ванстомс виртнень пожартнэнь эйстэ, теде башка эряви одкстомтомс виренть, путнемс од чувтынеть. Те иестэ Весероссиянь вирень путома чинть Саранскоень лесничествась тешкстызе акциясо, конань ютавтызь Новотроицкой средней школань лесничестванть марто. Вете иеде теде икеле Новотроицкоень школасо пурназель «Росток» школань лесничествась. Кемень гектарт мода, конань мельга эряви ванномс, путозь экологической ян. Те иестэ понгавсть 30 письмаркудот. Отрядонь кавто тонавтницят эсест проектэст невтизь регионютконь экологиянь пелькстамосо, «Урбоэкология и геоэкология» секциясо ды лиссть изницякс. Кенярдовты сеяк, што те акцияс сакшность «Смольный» национальной парконь представительть, конат шнамонь конёвсо тешкстызь «Росток» школань лесничествань эйкакштнэнь. Кемтяно, лисьмапрянть перька путозь чувтынетнэ кармить касомо, а школань лесничествась – мельгаст ванномо.