Ве шкань ярмаконь пандомадо тонавтнемань од иеденть икеле (ЭРЗЯ)
Те иестэнть сон карми 1500 целковойть эрьва тонавтницянть лангс. Истямо лувось кирдеви 2001-це иестэ саезь. 2015-це иес ярмактне явовсь кудораськетнень ниле категориятненень. Кавто меельце иетнень перть сон явови кото категориянень. МР-нь ломантненень социальной лезксэнь максомань министерствань пособиянь ды субсидиянь отделэнь прявтось Вера Ботина тешкстынзе, кить кандовить неть категориятнес. Те тетятне-аватне, конат кастыть ниле ды седе ламо эйкакшт-тонавтницят; колмо ды седе ламо эйкакшонь ськамост триця аватне; 1 ды 2 группань инвалидтнэ тетятне-аватне, конат трить тонавтницят; опекунтнэ ды сеть кудораськетне, конат трить саезь эйкакшт-тонавтницят.
Истяжо пандомась явови сеть тетятненень-аватненень, конат трить колмо эйкакшт-тонавтницят ды кавто эйкакшонь-тонавтницянь ськамост триця аватненень, бути доходост эрямонь минимумдонть седе аламо. Республикасонок те 8 441 целковой. Ярмаконь явомга эряви пшкадемс эрямо таркань коряс социальной комплексной центратнес умарьковонь 10-це чис.
Эрявикс документнэде информациясь максови комплексной центратнесэ ды ломантненень социальной лезксэнь максомань министерствань сайтсэнть. Пособиясь кучови счётс. Сескскак, заявлениянь сёрмадомадо икеле эряви сонзэ панжомс ды реквизиттнэнь тешкстамс. Арсеви, пандоматне кармить максозь 3 тёжадо ламо тонавтниця лангс. Те малав 5 миллионт целковойть республикань бюджетстэ.