Вайгелентень – 10 иеть! (ЭРЗЯ)
Республикасонок тиринь кельсэ гайгить ансяк кавто радиот. Вейкесь минек телерадиокомпаниянь, омбоцесь «Вайгель» радиопрограммась, кона тедиде тешкстызе кемень иень топодеманть. Сонзэ теицятнень вайгелест ней уш содавикст кунсолыцятнень туртов. Ансяк аволь ламотне содасызь сельмс журналисттнэнь, конат эрьва чи пачтить кулят эрзянь, мокшонь кельтнесэ. Марина Агеева, Екатерина Кирдяшкина, Елена Старкина ды прявтост Светлана Пивкина — те сынст вайгелест гайгить 73, 88 УКВ частотасонть эрьва чи кемкотово чассто саезь кевейксэес. Истямо аволь покш, ояксчинь кирдия коллективест «Вайгель» радиопередачань теицятнень. Марина Стешина, кона те шкас лисни Агеева фамилиянть ало, радиостанциясонть важоди васенце эфиртнэстэ саезь. Кемень иетнень перть тейнесь передачат эрьва кодамо темас. Екатерина Кирдяшкина те коллективсэнть сисем иеть. Ламо шка яви общественной тевтненень. Весе корреспондентнэ парсте содасызь тиринь келенть, тевень содазь саить интервьют, вадрясто анокстыть эфиртнэнь. Вайгелень программатне лиснить Европа Плюс радиостанциянь юрсо, конань прявтокс ашти Вячеслав Терёхин. Нама, кодамояк эфир а тееви звукорежиссертнэвтеме. Эйстэдест кавто ды кавонест мелень путозь топавтыть тевест. Сынь а содасызь эрянь, мокшонь кельтнень, теке марто маштозь мазылгавтыть музыкасонть заставкатнень, муить эрявикс морот. Коллективенть келепелев бажамозо — покшолгавтомс диапазононть, полавтомс частотанть. Пек учотано, зярдо совавтовить эрямос бажамост. Икелев молема ки, коллегат!!!