Василий Ельмеевонди – 90! (МОКША)
Пушкинонь лемса национальнай библиотекаса кочксевсь пуромкс, кона лемтьфоль Россиянь наукань заслуженнай деятельть, философскяй и экономическяй наукань докторть Василий Емльеевонь шачема шиста 90 кизонь топодемати. Илядьса ульсь лама ломань. Синь ётксост Василий Яковлевичень учёнай ялганза, учениконза, вузонь преподавательхть, студентт, писательхть. И ломаттне, кие лац содазе профессорть, кельгозь сонь. Василий Ельмеев шачемас коре Рузаевскяй райононь Сузгярьге велень, пуромксса ульсть сонь земляконза, велень администрациянь оцюнясь и фольклорнай ансамбльста аватне, конат моразь профессорть мяльс туф моронзон. Лиятне лятфнесть Василий Ельмеевонь эряфонц колга. Кодама путкс сон максс Российскяй наукати. Школать аделамда меле Василий Ельмеев поступась тонафнема Ленинградскяй государственнай университетонь философскяй факультету. Цебярьста аделамдонза меле смузю студентть кадозь аспирантурав тонафнема. 1963-це кизоня сон аралазе философиять коряс васенце докторскяй диссертациянц. Университетса тонафнемста шачсть Ельмеевонь маштомашинза и лия ширетнень эса. Сон ётафни эрь кодама исследованият. Кемоста кярьмодсь наукати. Василий Ельмеев пцтай сембе эряфонц ётафтозе оцю ошса – Санкт-Петербургса. Но ашезе юксне эсь шачема веленц, сонь ломанензон. Сидеста васетькшнесь мархтост, корхнесь ся кяльть мархта, конань максозь тейнза тядяц и аляц.