Васенце августста сявомок ушеды «Финно-угр года» пялькстомась (1 августа начинается прием заявок на конкурс «Финно-угр года») МОКША

Комсь вейхксоце июльста сявомок васенце августти молемс Тарту ошса, Эстонияса, етафтови финно-угорскяй од ломанень ассоциациять 12-це Конгрессоц. Пленарнай заседанияда башка форумть пингста кармайхть работама эрь кодама секцият. Тя пуромксса фалу няфнесазь пряснон ся од ломаттне, конатне пичедихть финно-угорскяй нароттнень вандыень шиснон инкса. Штоба мумс инь активнайть национальнай прянь няемань касфтомать мархта сотф тефнень тииснон еткста, арьсеф етафтомс «Финно-угр года» пялькстомась. Заявкатнень примама ушедыхть финно-угорскяй од ломанень ассоциациять Конгресстонза меле.
Кода пачфтезе тейнек МАФУН-ть эксперно-аналитическяй и проектнай покодемать коряс вице-президентоц Василий Немечкин, инь главнай вешфкссь пялькстомань участникненди — содамс финно-угорскяй фкя народонь кяль. Кизос коре вешфкссь фкя – штоба участникне улельхть 14 кизода аф отт и аф сирет 35 кизода.
Кда мекольце 12 ковста тя или тона од ломанць цебярь ширде няфтезе прянц финно-угорскяй нароттнень культураснон касфтомаса-виензафтомаса, аньцек эста сонь эздонза сявови заявка тя пялькстомати.
Оргкомитетти и жюрити сувафтовихть финно-угорскяй странань эзда культураса, наукаса и лия ширеса покодихть. Синь ванцазь сембе заявкатнень и азсазь ся од ломанть лемонц, конац маластонь кизоть кармай каннема «Финно-угр года» лемть.
Участникнень инкса заявкат максовихть и эрь кодама организациятне, конатнень видеса синь покодсь и вятсть тефт национальнай культурать, кяльть, койхнень и обуцятнень вельмофтеманкса, од ломаттнень еткса национальнай прянь няемать касфтомаса. Азома ся, што тяфтама пялькстома финно-угорскяй мирса етафтови васенцеда.