Варжеляйти – 300 киза. (МОКША)
Велень школать видеса пуроптфоль ваймаманди оцю васта. Тертьфтольхть райононь оцюнятне, тястонь содаф ломаттне, конат эсь цебярь тевснон мархта сатсть оцю тёкшт образованияса, культураса, велень хозяйстваса и промышленностьса. Ламоцненди тя шиня казьфтольхть благодарственнай сёрмат райононь оцюнять лемста. Улихть тя велеса нинге ломатть, конат пичедихть Варжеляйскяй велень поселениять вандыень шинц инкса. Кочкамок и арьсемок илать программанц, серьгядсть тяза Пензенскяй областьста Спасск ошста артистт, аватне анокласть суронь пачат, шову поза – сембось тифоль сянкса, штоба шарфтомс оттнень и вяре ащихнень мяльснон таколфты кизефкснень лангс. Велеть илац и Тройцянь праздниксь максть од вийхть — эрягат илать аноклаензонды. Лама синь мяльдост-арьсемадост маластонь пингти: петнемс велень клубть, велева тиемс кит, мазолгофтомс эсь шачема ширеснон. Шарьхкотьф, велетне шамондыхть и од ломаттне сяда сидеста тушендыхть оцю ошненди. Но сят, кие шабакс пингста тонадсть модати, аф юкстазась эсь юрснон. Тяфтамкс кассь Пётр Пяткин, конац ащи примеркс од цёратненди и стирьхненди. Аф стак кой-кит эздост нльне морамок гармонияса пичедихть веленяснон инкса.