Ванфни кунардоннеть эса. (МОКША)
Кевфкиеце классонь тонафнись Дарья Бочкарёва эсь кядьса тиенди бисерста авань мазы наряжампяльхть. Тя тевсь веши эздонза аф аньцек маштомаши и седиень кирдема, но и мокшэрзянь коень-обуцянь содамат. Стирнясь тяда башка сермады кот фланга, лац рисавай. А бисерста и лия эрь кодама паршиста аф аньцек кодамовок оцю илатнень пингста, но и стак шиня васьфтят наряжаф мокшэрзянь щамса ават, од стирьхть, кргасост, мяштьсост, да и пряруцясост эрь кодама пиндолды и цифторды мазыши. Сяс Дарья Бочкарёвать кядьса тифоц салси мяль. Эрь вещась фкя экземплярса. Стирнясь лама лувонды, сотци лия эрь кодама источникнень эзда историять, сире наряттнень колга. Лама азонкшни тянь колга сонь бабац. Дарья ушедсь котф ланга сермадома и бисерста мазышить тиендема сисем кизоса. Сонь смузьшинц и ламос ащекшнеманц няезе сонь учителец, кона сяда тов тонафтсь стирнять эса. Ветеце класса Дарья няфнезень эсь работанзон республиканскяй и межрегиональнай пялькстоматнень эса, коса сон занцезень васенце васттнень. Якстерь дипломса аделазе художественнай школать и вов ни кевфкие киза ялгаксты декоративно-прикладной творчествать мархта. Сонь мялец поступамс Санкт-Петербургскяй промышленнай технологиянь и дизайнань университету. Дарья Бочкаревать инголе ащихть оцю цельхть. Мезе сон арьсесь, сянь пяшкодьсы. Стирнясь лувондсы, што сонь тевоц лезды ванфтомс мокшэрзянь народть ингольдень сатфксонзон. Мрдафнемс тя мазышить фалу салсесы сонь мяленц.