Ванды – Кльхчянясь (Завтра – Крещение Господне) МОКША
19 январьста – Клюхчянясь. Тячи веть Шкайти кемай ламоц ломаттне кармайхть эшеляма аньцемаса. Саранскяйса эйварят аноклафт Вирень эрьхксса, Гончаровонь лемса куронь, «Старт» стадиононь, Макаровка велень, Добровольный поселкань ведь перяфкснень эса, Куликовка велень Казанскяй Божьяй Матерьть лемса лихтибряса. Ведть светямац церькафнень эса моли кафта шит – 18 и 19 январьста. Крещениянь ведсь лезды эрь кодама сярятьфонь пчкафтомаса, ваймонь петемаса. Кой-кона велетнень эса Клюхчянянь весь етафневи атяньконь-бабаньконь койснон и обуцяснон мяльс сявозь.