В Ульяновской области прошел IV фестиваль мордовской культуры (мокша)

Ульяновскяй областень Старомайнскяй райононь Базарно-Мордовский Юрткуль велеса етафтовсь «Велень Озкс» мокшэрзянь культурань фестивальсь. Илати якась делегация Мордовияста.

Эрь мокшень и эрзянь велеть улихть сонцень коенза и обуцянза. И синь кородозь ванфтовихть, аф ваномок сянь лангс, ичкозе ли республикать эзда эряйхть минь ломаненьке. Базарно-Мордовский Юрткуль велесь – мокшень. Мордовияста делегациясь пачкодсь тоза васенцеда. Рав кужень финно-угорскяй народонь культурань центрать покодиец Ольга Кулаевась корхтай, што тоса эряй мокшетне пяк лац васьфтезь республикастонк делегациять. Кенярьдезь лувсть ускф «Мокшень правда» газетать, «Мокша», «Якстерь тяштеня» журналхнень эса. А фкя бабанять нльне сельмоведензовок шудесть, мзярда сявозень кядезонза минцень кяльсонк лисенди изданиятнень.

«Велень Озкс» фестивальсь етафтовсь нилецеда. Тядде кочкафне няезь аф аньцек Ульяновскяй областень творческяй коллектифнень выступленияснон, но и Мордовияста сафнень. Шабрань аймаку якасть Мордовиянь Заслуженнай артисткась Любовь Князьковась, Инсарскяй райононь «Поюня» ансамбльсь. Няфтьфоль мокшень и эрзянь писательхнень писательхнень литератураснон эзда кочкаф выставка. «Терневи инь сире, эряфкшу ломанць велеста и сон крьвяснесы родонь-плямань штатолть. Тяфта мокшетне анайхть Шкайть кядьста цебярь эряф, козя урожай. Тя койсь пяк кунардонне», — корхтай Ольга Кулаевась.

Фестивальсь шарфты «Велень Озкс» илать лангс,конац уленди Мордовиянь Большеигнатовскяй районца. Етафтови сон стане жа, кода и минь республикасонк. А тя тага весть корхтай сянь колга, што атяньконь-бабаньконь койсна аф юксневихть и ванфневихть мезеньге лангс апак ватт.