Урядамань пинге (мокша)
Ваймама сембе шитнень эзда коммунальнай службаса покодихне регионцонк урядасть ловть эса. Тялонь ушеть и общественнай транспорть якаманц колга корхтасть Госсобраниять и ётай пуромкссонза. Мордовиянь Оцюнясь Артём Здунов китькстазе: ловть эзда васттнень урядамаснонды коммунальнай службаса покодихне путсть аф кржа вийда.
Ловонь урядамась мольфтевсь ваймама шитнень перьф — тянь колга азонды ошень оцюнять Игорь Асабинонь телеграм-каналоц. Покодихть техникань пцтай ведьгемонь единицат и кота сядода лама ломань. Ошень сембе райоттнень эса урядсезь ловонь фальхнень и кайсесть китнень лангс эйть эзда специальнай материалхт. Тяса лездсь и ловонь урядамань машинась. «Зрнянь кядьсонза» комозь тоннаса самосвалть грузясы 5-7 минутаста. Урядамать квалма кизефкснень коряс корхтасть Госсобраниять ётай сессиясонза. Игорь Асабин пшкядсь, што сембоц ошсонк ловть урядсасазь техникань 130 единицат. Аньцек синь аф сатнихть, эряви нинге сяда. Кудперьфнень эса тёжяда лама покоди. Общественнай транспорть шуроста якамац — содаф прябалась. Аф сатнихть водительхть. Тяда башка, тапсевихть автобусне, конатнень тиись аф ёрай петемс гарантиять коряс. А мзярс ловонь урядамась ашезь лотка, фальхне стак и шоворяйхть ошень и муниципальнай движенияти. Рузаевкаса покодихть техникань аньцек 8 единицат. Ловть эса урядайхть ошть кучкаса и магистральнай китнень эса. Мордовиянь Оцюнясь китькстазе: коммунальнай службаса ломаттне покодихть лац, аньцек аф сембось нинге тиф. Маряви ловонь урядамань техникать аф сатомац — нинге эряви решандамс муниципальнай паркста самосвалхнень и тракторхнень юмамаснон квалма кизефксть. Тяса лездыхть правоохранительнай оргатне. Ошть тяниень пингонь задачац — урядамс китнень — тротуараста сявомок магистральти молемок.