Умарьковонь 14-це чистэ 16 чассто эрзянь ды мокшонь раськень культурань музейсэ панжови Константин Варналинэнь «Родное и близкое» васенце персональной невтемазо (эрзя)
Артомантень вечкемась Константин Варналинэнь эйкакшпингстэ саезь. Авторонть валонзо коряс, сон сырькаензэ, математикань тонавтыцянть Арифа Умяровна Резаковань ды аванзо Тамара Усмановнань пельде. Сынь эсь шкасто а беряньстэ артсть. Мельгаст Константингак венстявкшнось карандаштнэнень ды тюстнэнень. Ансяк сехте васенце критикекс, питнень ды превс путыцякс Константинэнь туртов ульнесь ды кадови тетязо — Владимир Константинович, кона 40 иеде ламо важодсь кинооператорокс мордовиянь телевидениясо ды ульнесь парсте содавикс Мордовиянь ламо содавикс артыцятнень марто. «Родное и близкое» выставкасонть невтевить живописень ды графикань малав 70 произведеният. Прявт темась – тиринь ёнксонь пертьпельксэсь, малавикс ломантне, перьканок эрямось.