Ульяновск ошсо ютась “Кубок дружбы” вишка пильгеоскань коряс пелькстамо (ЭРЗЯ)
Масторонь ванстыцянь Чистэ Ульяновск ошсо ютась вишка пильгеоскань коряс пелькстамо, кона алтазель раськетнень ютксо ояксчинтень. Налксематнесэ эсь виест невтсть тесэ эриця раськетне ды омбомасторонь студенттнэ. Тердезельть инжеть Мордовиястояк. Вишка пильгеоскань коряс васенце пелькстамось тесэ ютавтозель
2008-це иестэ. Тедиде тензэ топодсть 10 иеть. Пелькстамонь прявт путовксокс ловови раськетнень ютксо ояксчинь сюлмавомань теемась. Весень туртов спортонь покшчинть иеде иес ютавты Ульяновск ёнксонь азербайджанонь вейсэндявксось. Налксематне ютасть олимпиадань лувонть коряс. Весемезэ пелькстасть 24 командат. Эсь виест невтизь эрзянь, татаронь, ветькень, азербайджанонь, узбекень, таджикень, армянонь, евреень вейсэндякстнэ, ды истя жо Вьетнамонь, Палестинань, Дагестанонь, Осетиянь, Украинань, Пакистанонь ды Африкань командатне. Те малав 350 ломанть. Тердезтнень ютксто ульнесть Мордовиясто 2 командат – «Сурвеле» ды «Барс». Пелькстамонь налксематне свал кирдить талномасо ваныцятнень. Секскак эрьва налксемасонть педе пес а содави, кие юты седе икелев. Масторлангонь ванстыцянь Чистэнть анокт изнямс весе. Азат Амирханов сась истямо пелькстамос мельспаросо. «Барс» командасонть васенце налксемасо сынь изнизь Таджикистанонть – 2:1. Цёрась тешксты, истят спортонь покшчитне пек эрявить од ломантнень туртов. Весе налксематнеде мейле изницякс лиссь «Нефтчи» азербайджанонь командась. Финалсо сон 1:0 счётонть марто изнизе «Волгарь» ветькень вейсэндявксонть. 3-це тарканть саизе «Молния» командась, кона пурназь Ульяновск ёнксонь армиясо служицятнень эйстэ. Изницятне ды призёртнэ казезельть кубкасо, медальсэ ды шнамонь конёвсо. Мордовиянь налксицятне икелень иетнень коряс тедиде мезеяк эзть сае. Ансяк ней ули ламо шка весементь домкасто арсемс ды седе парсте анокстамс сыця иентень.