Уледе редицякс! (эрзя)
Мордовиясо поладовить интернетсэ манчематне. Неть читнестэ республикань эрицясь ёмавтсь миллион ды ветесядт целковойть. Закононь колыцятнень ульманть лангс истя жо понгсь 72 иесэ ава. Седе мейле манчицятне пачтясть: сюпалгадомга эряви кучомс седеяк ламо ярмакт. Авась кемсь: путсь счётонтень ещё вейке миллион 600 тёжат целковойть. Ды сеске интернет-нупалентень совамось сёлговсь. Истя жо манчицятнень ульмас понгсь 72 иесэ авась, конась ёмавтсь 207 тёжат целковойть. Гайневтицятне лемдизь пряст полициясо, седе мейле — ФСБ-сэ важодицякс. Пачтясть: аванть лангс кие-бути панжсь кредит. Ансяк ёвтнемс теде киненьгак эзть мере. Макссть кармавтома: каявтомс ярмакт кредитэнь картасто ды кучомс сынст ёвтазь реквизиттнэва. 45 тёжатне, конат ульнесть картасонть, эзть сато! Асодавикс ломантне тердсть авантень такси лия банков, косо манчицятнень кармавтомга сон сайсь 150 тёжас кредит. Весе неть ярмактнень авась кучинзе закононь колыцятненень. Неень шкане вешнить закононь колыцятнень. Манчицятне сюпалгадыть аволь ансяк сыре ломантнень зепстэ — истямо зыянс понгонить одтнэяк. Саранонь 18 иесэ эрицянтень кучсть фотографият, косо тонась ульнесь оршамовтомо. Кучицясь — кемгавксово иеде од тейтерь, конась алтась пшкадемс полицияс, бути цёрась а максы тензэ 35 тёжат целковойть. Тонась кучсь комсь. Ды сеске чарькодсь: понгсь закононь колыцятнень алтымас. Мордовиянь МВД-сэ ледстить: ков-бути ярмаконь кучомадонть икеле эряви парсте содавтомомс интернетсэ лопанть марто. Бути гайневтить асодавикст, сеске путынк трубканть.