Удмуртиянь инжеть. (Гости из Удмуртии) ЭРЗЯ

«Кильтырнаос» — истя лемдязь Удмуртиянь фольклорной народной ансамблясь. Рузонь кельс ютавтови «щеголихи», а лементь путызь сыненст Ижевск ошонь научной сотрудниктне. Кавто иеть теде икеле ансамблянь ветицякс кармась Зоя Ушакова. Фольклорной фестивальтнес сынь сакшныть паро мельсэ. Кезэрень оршамопелест сеске каявить сельмс: парсеень палятне, сюпалгавтозь кирьгакшсэ, ярмактне лангсост неень шкань. А вана вейке морыцянть сынь алкуксонь сиянь. Сехте покш середьксэст –сынст велень од ломантне а бажить ванстомс кезэрень моротнень. Саранскоев «Предания старины» фестивалев састь покш бажамо марто. Мелезэст тусь прявт ошонок, ломантне. Ошканть яксесть кезэрень оршамопельсэ. Мордовиянь эриятне кевкстнесть эйсэст, косто сынь састь ды мейстэ ашти оршамопелест. Седе ламо кевкстемат ульнесть Бытьмардо. Миньгак максынек те кевкстеманть. Аватне паро мельсэ ёвтнесть оршамопелень те пельксстэнть. Кантнильть сонзэ ансяк сюпав ломанть, а оршакшнызь покчитнестэ ды урьвакстома чистэ. А вана «Выльзардон» ансамблясь ловови одокс, пурназель Оркина велесэ 8 иеть теде икеле. Морыцятнень эйстэ киньгак арась музыкальной образованияст ды ансяк морамонтень вечкемась пурнынзе неть аватнень вейс. Оршамопелест эсест велень, кезэрень, стазь сыре аваст кедьсэ. Неть аватненьгак сэредьксэст вейке — арасть сынст моронь поладыцяст, а морсить мартост од ломантне. А эсест маштомачист моронь морамосо сынь невтнесызь истят ванна фестивальтнесэ.