Тядде топодсь 75 кизот «П.Ф. Рябовонь лемса идень 1-це художественнай школати» (В этом году исполнилось 75 лет «Детской художественной школе №1 им. П.Ф. Рябова») МОКША

Мордовияса инь сире художественнай школась, инь цебярь педагокне, Россияса и омба масторса содаф выпускникне – сембось тя азф идень 1-це номер художественнай школать колга! 2015 кизось тейнза кафтонь крда юбилейнай: школати топодсь 75 кизот кочкамстонза-тиемстонза и 105 кизот сонь васенце директоронц, художникть, педагокть оцю букваста, кинь лемонц гордость мархта каннесы школась – Петр Рябовонь шачема шистонза.
Мордовскяй АССР-нь Народнай Комиссаронь Советть 1940-це кизонь 1-це июнень мярьгоманц коряс Саранск ошень Мордовскяй изостудиясь лемтьфоль «Идень художественнай школакс». Эста тя ульсь васенцесь и фкя и сяка тяфтама школась республикаса. 1951-це кизоня оцюнякс тоза арась Петр Рябов. И ся пингста сявомок тонафнемань заведениясь кармась эряма ефси лиякс.
Тячиень шити тя фкя и сяка школась Мордовияса, конаса тонафнихть кафкса кизот. Начальнай, прикладной, живописнай и скульптурнай отделениятнень эса асушиснон кепсесазь 900 шаба. Кажнайсь эздост лувондсы тя школать омбоце кудкс.
Койхнень и инновационнай технологиятнень марса тевс нолдамасна максы цебярь сатфкст. «П.Ф. Рябовонь лемса идень 1-це художественнай школась» содаф аф аньцек Россияса, но и марнек масторлангса. Сонь тонафниенза 75 кизоста арасть сяськикс всероссийскяй и международнай эрь кодама пялькстомаса и фестивальса. Тядде кизонда састь цебярь куля:тя школать учениконза занязь 5 призовой васттнень 9 эзда международнай пялькстомаса Израильса.
Етай тонафнемань кизоть школась нолдась 80 талантливай выпускник. Казнекс кельгома тонафнемань заведенияснонды синь кадозь творческяй работаснон. И шять, кой-мзяра пингта меле, синь инксост тяса стане жа кармайхть няема пря,кода Валентин Попковонь, Игорь Сидельниковонь, Иван Черапкинонь и Мордовиянь и Россиянь лия содаф художникнень инкса.