Туристэнь од ки (эрзя)
С.Д. Эрьзя лемсэ искусствань Раськеютконь фондось ютавтсь скульпторонть эрямонь ды шкинемань таркатнева ванномань экскурсия. Васенце кунсолыцякс теевсть профессиональной вейсэндявксос совицятне. Ванномань экскурсиясь пурнась малав 30 гидт ды туристэнь компаниянь представительть. Од маршрутонь васенце экскурсиянть ютавтызе гидэнь-ютавтыцянь, экскурсиянь ветицянь ды туристэнь менеджерэнь Ассоциациянь аккредитация марто гидэсь Светлана Фисенкова. Экскурсиясь ушодовсь Мясницкой куросто, косо ашти Юшковонь Кудось. Те Московонь икелень живописень, лябамонь ды зодчествань училищась, кона Степан Эрьзянь шкинемань сыргозтемасо аштесь прявт таркасо. Весемезэ маршрутсонть 13 лоткамот. Ютксост Хомяковонь Кудось, косо Эрьзя эрясь ды важодсь Бродовскоень фотомастерскойсэ, Рождественкасо Строгановской училищась, косо сон тонавтнесь, историянь Государствань музеесь, косо кавксть невтнинзе эсензэ важодевкстнэнь, истяжо С.Т.Коненковонь Мемориальной музеесь. Коненковонь музеень экспозициятнева инжетнень ютавтынзе сонзэ прявтось Светлана Боброва. Сон тешкстызе, мастертнэнь шкинемань китне васодекшнесть а стяко: кавонест тейсть чувтосто, кавонест вечксть эсест тевест.
Ялго ютамонь маршрутось топавтозель «Москва скульптора Эрьзи» теварсевксэнть лувсо ды кирдеви культурань инициативань Президнтэнь фондонть лезксэнзэ вельде. Кинь кувалмозо 5 вайгельбеть. «Москва скультпора Эрьзи» туристэнь кавто маршруттнэнь эйстэ те васенцесь. Омбоцесь арсеви ялго ютамонь ды автобуссо ардомань. Маласо шкасто фондось арси ванномс сонзэяк.