«Торамантень» – 25! (ЭРЗЯ)
«Торама» фольклорно-этнографической ансамблясь 25 иень топодеманть тешкстызе покш концертсэ! Ансамблянь музыкантнэ варчнизь пряст музыкань эрьва кодамо направлениясо. Юбилейной концертсэ ваныцятне маризь аволь ансяк роконть, джазонть, паро мельсэ кунсолызь аутентичной ды камерной музыкань вейсэндямонть. Те ней эрьва эрзясь, мокшось содасы, кие ульнесь «Торама» асамблянь пурныцякс. Ютазь пингень вейксэньгеменце иетнестэ фольклористэнть Владимир Ромашкинэнь лементь содылизь аволь ансяк Мордовиясо. 25 иень ютазь ансамблянь музыкантнэнь икеле прявт путовксокс те шкас кадови цёрань ламо вайгельсэ морамонь ванстомась. Эрзятнень, мокшотнень морамонь койтнень ванстомадо башка, ансамблянь музыкантнэ свал бажасть одонтень. Те мелесь ветинзе сынст Яушев лемсэ музыкальной театрань оркестранть марто вейсэнь проектс. Пек парсте «Тораманть» содасызь омбо мастортнэсэ: Эстониясо, Финляндиясо, Латвиясо, Швециясо, Польшасо, Англиясо. 1999-це иетнестэ Эстониясо пурназель «Торамань» фан-клуб. Ансамблясь содавикс академической музыкань вечкицятнень ютксояк. Музыкантнэнь туртов сцена лангс эрьва лисемась свал канды кеняркс, мезе бути од. Эрьвась, кие сась кунсоломо «Тораманть», концертэнть эйстэ кадовсь покш мельспаросо, а ансамблянь пурныцянть, Владимир Ромашкинэнь ледстнить лембе валсо. Ламо вайгельсэ морамодо башка, те ансамблясь невти сцена лангсо кезэрень койтнень. А концертнэс сакшныть аволь ансяк эрзят, мокшот, сакшныть весе, кие вечксы сынст шкинемаст. Юбилейной вастовомасонть коллективентень максозельть республикань прявтнэнь пельде покш казнеть. «Торамась» кармась республикань прявтонь премиянь лауреатокс, а Пётр Тултаев тешкстызе, што маласо шкастонть Саранскоень куротнень эйстэ вейкесь карми кантнеме Владимир Ромашкинэнь лементь.