«Тиринь ёнксонь валдо» (ЭРЗЯ)
«Тиринь ёнксонь валдо» — истямо лем ало Полежаевень музейсэ панжовсь невтема, кона алтави Россиянь ды Мордовиянь культурань заслуженной роботникенть Татьяна Ковалёвань 80 иень топодемантень. Пурнавозтне аволь ансяк содавтовсть эрзяванть эрямопингензэ марто фотографиятнестэ, но и сынсь макснесть кевкстемат юбиляронтень. Содазь, Полежаевень музеесь- республикасонок литературань вейкине музей. Сонзэ нупальтнесэ свалшкане пурнавкшныть сёрмадейть, учёнойть, журналистт, лия ошонь ды региононь инжеть. Татьяна Ковалёванень неть вастовоматнесэ сеедьстэ савкшны кортнемс, ледстнемс коллеганзо, ялганзо ланга. Течи сонсь – покшчинь прявт инже. Тувталось редявикс- эрзявась тешксты юбилеензэ! Кудораськеде башка покш сюпавчикс лови ялганзо, свал анок тенст лездамс. Оятнеяк зярдояк а кадныть мельтеме малавикс ломанест, конань марто кеместэ сюлмавсь эрямокист. Невтемасонть, кона пурназь музейсэнть парсте невтевить эрзяванть эрямостонзо башка пелькстнэ. Лия ёнов а молиця фотографият, заметкат, статьят- ды те малав аволь весемесь, мезесь ёвтни ёроков ломанденть. 30 ламо иеть Татьяна Ковалёва важодсь «Эрзянь правда» газетасо, пенсияв туемадо мейле — «Сятко» журналсо. Вечксы тиринь келензэ, ашти каштанчисэ раськензэ кис- теде корты малав эрьва вастовомасо. Мельспаросо максы эрявикс превспутомат од журналистнэнень. Тешкстама, покш робота Татьяна Михайловна вети массовой информациянь средствань ветеранонь общественной вейсэндявкссо. Ледстнемат, ламо лембе валт, поздоровт! Казнекс юбиляронтень — «Авадо» морось, кона киньгак эзизе кадо мельтеме.