Тиринь келень чи. (День родного языка) ЭРЗЯ
Содазь, эрьва ие, чадыковсто, содавикс кельсодыенть Анатолий Рябовонь чачома чистэнзэ, масторсонок тешкстави тиринь келень чи. Тедиде регионсонок официальной мероприятиятнень арсезель ютавтомс чадыковонь 19-це чистэ. Коень коряс, покшчинть лувсо ютавтовить эрзянь, мокшонь келень коряс мастер-класст. Тиринь келентень вечкемась ушодови эйкакш порасто саезь. Те валрисьменть пек домка смустезэ. МР-со государственноекс лововить рузонь, эрзянь ды мокшонь кельтне. Секскак ошонь весе образовательной учреждениятнесэ сынь тонавтовить. Косо кода предмет, а косо факультативень ды кружоконь лувсо. Саранск ошонь 90-це номер эйдень кужосонть вана уш иень перть роботы национальной культурань центра, косо свал анокт масомс лезкс ушодыця педагогтненень. Тиринь келень тонавтомань коряс мастер-класстнэ ютавтовсть колмо группава. Эряви ёвтамс – эрьва педагогонть те тевенть топавтомга эсензэ вановтозо. Эйкакштнэ жо покш мельпаросо теить весе кармавтоматнень, тонавтнить морот, валморо ды весемесь юты налксемань лувсо. Мастер-класстнэс содамочист пештямо сакшность ошонь весе эйдень кужотнестэ тиринь келень кружоконь ветицятне. Эрьванть икеле ашти покш тев – ванстомс тиринь кельтнень, культуранть. Парсте ветямс эйкакштнень марто важодеманть, явовтомс мелест кельтненень. Пачтямс тонавтницятненень меленть тиринь келенть ды культуранть эрявиксчидест. Чарькодеви, бути уш велетнесэ стака кирдемс-ванстомс чачома келенть, ошсо те тевенть топавтомс сядоксть седе стака. Кемемась ансяк тонавтыцятнень лангс, конатне кодамояк тувталь лангс апак вано бажить теемс вечкевикс тевест.