Теньгушевань сисем тюсонь кодавкстнэ. (ЭРЗЯ)
Теньгушевась кезэрень шкатнестэ ульнесь содавикс кода покш ярмункань ютавтома тарка. Велень эрицятне кемевтить, мазыйстэ кодамо сынст ёнкссо маштсть «Тюштянь» пингстэ саезь, а неень шкань кодазь оршамопельтне эсест лувонть кирдить кевейксэеце пингестэ саезь. А комсеце пингень ушодовомсто Теньгушевась кармась мазый тюссо кодамонь куншкакурокс. Теньгушевань буень авань оршамопелесь мазылгавтозь сисем тюсонь понань сурестэ кодазь сэрей носкасо. Кода кортыть неень кедьчелькев аватне, коесь те моли кезэрень шкатнестэ саезь. Таго зярдо, маласо аштиця Арзамас ошсо, кодыльть кемть, конатнень лангсо невтезельть касовксонь сёрмадовкст. Неть тешкстнэнь мастерицатне саизь артовкс лангсто, конатнень вельде тонавтыльть крёстсо викшнеме. Мазый тюсонь сэрей носкатне, лия ёнов а молиця пряс путомась – те буень оршамопелень башка ёнкс. Икелень шкатнестэ реветь те буесэнть кирдильть малав весе, мекс понанть эйстэ кевердильть лембе кемть, кодыльть варьгат, носкат. Шканть молеманзо марто ламот кадызь те тевенть, а вана сисем тюсонь понань сурестэ кодамось истя кеместэ совась Теньгушевань аватнень эрямос, сынь тень топавтыть течинь чис. Кодамонь коень ванстыцякс ловови Александра Васильевна Ерёмина, а эйкакшонь искусствань школасо те тевентень тонавты Вера Куликова. Кодамось, кода и матрёшкань тоцямось, артомась те буесэнть – кудораськень тевветямо, конань салавачитне ванстовить пингеде пингес. Теньгушевань варьгатнень, сэрей носкатнень лангсо улить касовксонь орнаментэнь кавто лувт: вейкесэнть винань марень лопат, омбоцесэнть – кузнэ ладсо кодазь тарад. Эрьва кодавксось канды смусть. Ловови, истямо кодавксонь кантницясь ванстови берянь сельмеде, а мазый тюсстнэ кепедить мель. Прикладной искусствань те ёнксось Теньгушевасо ванстови те шкас. А сисем тюссо кодазь варьгатне, кирьгапацятне мазылгавтыть аволь ансяк Россиясо эрицятнень. Омбо масторонь ломантне паро мельсэ кантнить неть оршамопельтнень.