Течи ютавтовсь Мордовия Республикань Прявтонть Артём Здуновонь виде линиясь (эрзя)
Региононь ветицясь виде эфирсэ ёвтнесь республиканть туртов сехте эрявикс ёнкстнэде ды Мордовиянь команданть вельде ютавтовиця важодемадонть, экономикань ды туризмань виевгавтомадонть, СВО-нь боецтнэнень лездамодонть, кудораськетненень кирдемань политикадонть, шумбра кувака эрямонь виевгавтомадонть. Артём Здунов тешкстызе, федеральной центранть – Россиянь Президентэнть Владимир Путинэнь ды масторонь Правительстванть лезксэст вельде Мордовиясь топавты инфраструктурань ды социальной проектт. Весе сынь аравтозь ломантнень эрямост вадрялгавтомантень. Эрицятнень пельде пачтязь пшкадематнень прявт кевкстематне – китнень витнемась, коммунальной инфраструктурань одкстомтомась, общественной транспортонь важодемась, вадрялгавтомась-мазылгавтомась, Мордовиянь буетнесэ школатнень ды социальной инфраструктуранть важодемась. Виде эфирэнть шкасто видеосвязенть вельде талновтыця кевкстематнень кортамонтень вейсэндявсть региононь властень ды местной самоуправлениянь органтнэнь ветицятне. Аволь весе кевкстематне ёвтазельть виде эфирэнть лувсо, ансяк весе сынст топавтсынзе Мордовиянь командась – республикань эрицятненень сынст лангс каршо валт пачтявить. Стакачинь таркатнень витемань коряс важодеманть кармить ветямо кирдивийтне ды общественниктне вейсэ. Зярыя пшкадемат региононь Прявтось кармавтсь саемс башка ванновт алов Владимир Быковнень Саранск ошонь округонь прявтонтень. Эрицятнень пельде састь зярыя мельть – арсемат, конат сюлмавозь прявтошонь вадрялгавтоманть-мазылгавтоманть марто – Артём Здунов кирдинзе ды кармавтсь саемс сынст важодемас.