Те иестэ саезь республикань краеведениянь музеезь одс карми ютавтнеме археологической исследованият. (С этого года республиканский краеведческий музей возобновляет археологические исследования) ЭРЗЯ

Музеень археологось Пётр Анастасин макссь яволявтома раскопкань ютавтомадо. Васенце молевксэсь карми Покш Березникень районов, косо ютазь пингень 70-це иетнестэ муезель кезэрень эрямо тарка. Археологонть  туртов те васенце молема, конань прявтокс карми сонсь. Теде икеле весе исследованиянтнень ютавтнесь вейсэ лия археологтнень марто. Наукасо сон малав кемень иеть ды зярдояк эзь янксе, што кочкизе те кинть. Археологической экспедициянть арсеви ютавтомс таштамковсто. Краеведческой музеень археологтонть башка арсеви тердемс научно-исследовательской институтонь важодицят. Тевесь сеньсэ, што музеенть зярс арась исследованияс эрявикс оборудования, секскак лездыцякс кармить институтонть археологтне. Теке марто маласо шкасто музеесь арси рамамс эрявикс оборудованиянть. Музейсэ важодиця археологонтень сави пек ламо шка ютавтомс экспозициянть пурнамсто. Краеведениянь музеень археологиянь фондтнэнь ламочись малав 30 тёжат единицат. Секскак сонензэ экспозициянь, выставкань анокстамсто, свал сави ламо шка ютавтомс фондсо ванстовиця экспонатнэнь марто, муемс юткстост истятнэнь, конатне зярс косояк эзть невтевкшне. Мордовиясо археологтнеде аволь пек ламо. Весе сынь содыть вейкест-вейкест, истяжо содыть сеть раскопкатнеде, конатнень сынь ютавтыть. Археологиясо эсест муевкстнэде сынь ёвтнить научной конференциятнесэ, кода минек регионсо, истя омбо мастортнэсэяк. Мордовиясо меельце покш конференциясь алтазель этногенэзэнтень ды пурнась ламо археологт Россиянь зярыя регионтнэстэ.