Татарстанонь Тетюшской райононь Кильдюшево велесэ ютась «Валда Шинясь» эрзя-мокшонь культурань республикань нилеце фестивалесь. (ЭРЗЯ)

Кезэрень шкатнестэ саезь Тетюшинь модась ловови эрьва кодамо раськень, культурань, коень вейсэндямо таркакс. Ламо пингень перть те районсонть вейсэ ды покш ояксчисэ эрить эрьва кодамо раськень ломанть – рузт, татарт, чувашт, эрзят ды мокшот.  Эрьва кодамо раськень тежат ломанть пурнавсть вейс эрзянь ды мокшонь мазый оршамопельтнень ваномо, паро ёжомарямонь кандомо, Кильдюшевской модадонть ёвтамонть кунсоломо ды мазый представлениянь ваномо. Эрьва ие те кенярксчисэнть покш делегация Мордовиясто. Пек паро, республикань эйстэ ве ёнояк минек диаспорась а стувты эсензэ ундоксонзо ды паро мельсэ ютавты покшчить. Кенярксчинь кужонь мазылгавтыцякс ульнесть творческой коллективтне. Сынст мазый, кезэрень койтнень коряс стазь оршамопелест кенярдовтсть сельмть. Мородо башка ломантнень туртов роботасть невтемат, косо весе бажицятненень меревсь рамамс ёроков кедь ломантнень теевксэст. Вешкемат, сёвоньстэ теезь чакшт, викшнезь картинат, медь, салтомат, варения ды сувенирной эрьва кодамо продукция.