«Сы шкань эрицятнень туртов». («На память потомкам») ЭРЗЯ
Неть читнестэ военной ды трудовой подвигень мемориальной музеэсэ ютась «На память потомкам» лементь ало ледстнемань чокшне. Алтавсь сон МР-нь заслуженной роботникентень, МР-нь Прявтонь премиянь лауреатонтень, краеведэнтень Иван Бурнайкиннэнь. Чадыковонь 19-це чистэ сонензэ тободевельть бу 80-нь иеть. Иван Степанович чачсь 1936 иень чадыковонь 19 чистэ Кочкурбуень Вирь ало Тавла велесэ. Сонензэ топодекшнесь ансяк ие, зярдо кулось тетязо Степан Васильевич, конань велесэнть содылизь кода весеменень лездыця паро ломанень. Авазо кадовсь колмо эйкакш марто, чинь-чоп важодсь колхозонь паксясо, эйкакштнень кадылинзе чаво кудос. Иван Степанович ульнесь сех вишкине. Аламодо касозь, сон аванзо марто кармась якамо паксяв, лездась. Тень кисэ сонензэ кармасть макснеме кши. Ансяк эрямось кармась вадрялгадомо, тесэ ушодовсь войнась. Сисем классонь прядомадо мельга ушодсь важодеме колхозсо. Мейле ульнесь армиясо служамось. 1958 иестэ Иван Степанович велявтсь армиясто. Кодгеменце иетнестэ кармась важодеме автосамосвальной заводсонть, ульнесь цехень ветицякс. 1991 иестэ сы роботамо военной ды трудовой подвигень мемориальной музейс ды кеместэ чопавты патриотической тевентень. Эсензэ ярмак лангс ардтнесь масторонь келес, вешнесь сеть солдаттнэнь калмост, кить маштовсть Ине войнасонть. Важодемань перть сон кинень ансяк эзь лезда малавиксэнь вешнемасо. Колоньгемень кавксо исследовательской иетнень перть мелензэ коряс ульнесть панжозь кемколмово музейть ды зярыя ледстнемань кужот. Теде башка панжозельть комсь ниле мемориальной лазт, вете памятникть ды ниле бюстт. Иван Степанович сёрмадсь зярыя книгат, ламо очеркт ды статьят. Зяро те ломаньсэнть ульнесь вий, зяро вечкема топавтовиця тевентень. Истятнэде кортыть: а соды оймамо!