Сурскяй араламань рубежть тиеманцты реконструкциясь (мокша)

Народнай подвигонь колга мяляфтомась тага лиссь историянь лопаняста. Ленинградть блокаданц валхтоманцты топодсь 80 киза. Тя шити ётафтовсь Сурскяй араламань рубежть тиеманцты реконструкциясь. 300 лама участник ётафтозь эряфс стака пингонь событиятнень.
Ся пингс, мзярс алятне аралазь Шачем ширеть, Поволжьясь лядсь аватнень, шабатнень и сире ломатнень кядьс. Араламань од васттне — сянди, кда врагсь пачкоди Моску ошти. Кафксогемонь вайгяльбес — танконь карша ащи лоткт, блиндажт, окопт и модань кудт. Сурскяй рубежть тиезь фкя пяле мархта ковста, но тяфта и ашезь эрявкста. Сурскяй рубежень тиемаса примасть участия Мордовиянь 70 000 эряйхть. Аф якшама тялось, аф вачашись, аф урматне ашесть ара шоряфксокс. Тняра пингта меле мяляфтомать ваныенза эрь кизоня васетькшнихть Сура ляйть трваса. Васедемась лемтьф сембонди, кие лездсь Сяськомати.
Реконструкцияса — од патриоттне и юнармеянь ломаттне. Эрь участниксь эсь мяльсонза ётафтозень седиенц пачк историянь событиятнень. Шачем ширень сембе аралайхнень вийснон и кемашиснон лятфтазь кашт аф корхтама минутаса и путсть панчфт мяляфтомань знакти. Явозь и блокадникнень стакашиснон: фкя кядьс макссевсь сяда комсь вете граммт кши. Аймакса патриотическяй покодемась поладови. Сяда тов мяляфтомань вастса срхкави тиемс историческяй комплекс.