Сургутонь «МасторАва» национально-культурной куродо. (ЭРЗЯ)
Россиянь нефтень прявт ошсо, Сургутсо, кемень иень перть важоди «МасторАва» эрзя-мокшонь раськень культурань курось. Пурнызе сонзэ мокшонь ломань, Рузаевкань буень Трускляй велень чачозесь, Геннадий Наркаев. Ламо иень перть Ханты-Мансийской автономной округов минек масторонь республикатнестэ тукшность ломанть. Ютксост зярыя Мордовиястояк. Весероссиянь 2010 иень сёрмадстомань коряс те округсо эрить малав 7 500 ломанть, конат ловить пряст эрзякс, мокшокс. Кемень иеть теде икеле Геннадий Наркаев сась Мордовияв мель марто, пурнамс Сургутсо минек раськень ломанень куро. Пачтясь теде Мордовиянь раськень политикань министрантень. Александр Лузгин вастызе кулянть вадрясто, алтась лездамс те тевсэнть. Ушодксось теезель. Седе тов ульнесть од сюлмавомат Мордовиянь кирдивийтнень марто. Лездасть те тевсэнть Сургутонь прявтнэяк.
«МасторАвань» активисттнэ свалшкань инжеть ошонь фестивальтнесэ, концертнэсэ. Нама, седеяк пек вечкеви, зярдо Сургутонь эрзятне-мокшотне ютавтнить вейсэнь вастовомат, косо кортыть ансяк тиринь кельсэ. Геннадий Сергеевич сонськак вадрясто корты мокшокс, парсте чарькодьсы эрзянь келенть.
Неть читнестэ прядовсь «Равось-ояксчинь лей» раськеютконь этнокультурань экспедициясь. Сонзэ ютксо ульнесь Сургутонь «МасторАва» куронь прявтоськак. Те ульнесь сонзэ васенце истямо лувсо Равонть чиретнесэ эриця раськетнень марто вастовома.
Тиринь ёнксов, кона истя васоло неень шкань эрямо тарканть эйстэ, сонензэ савкшны понгонемс иес весть! Пек кенярды, зярдо сыть тердемат регионсонок ютавтовиця раськень покшчитнес. Теке марто те свал важодема. Нурька шкас тиринь ёнксов самось – свал кенярдома. Раськензэ марто, а сынденст течинь респондентэнть тесэ пек ламо, вастовоматне пештясызь седенть лембечисэ, а тевсэнть максыть од вийть!