Степан Эрьзя лемсэ изобразительной искусствань музейсэнть панжовсь Мордовиянь заслуженной художникенть Михаил Салдаевень ды керамистэнть Светлана Борисовань юбилейной выставкаст. (ЭРЗЯ)
Экспозициясонть невтевить живопись, графика, монументальной ды декоративно-прикладной искусствань произведеният, конатнень Михаил Васильевич ды Светлана Сергеевна теизь шкинемаст перть.
Те ней сонзэ лемезэ содавикс ды гайги покш оштнэсэяк. А ушодовсь весемесь ламо иеде теде икеле, зярдо школасо тонавтнемстэ, покш мелезэ ульнесь тонадомс мазыйстэ артомо, сёвоньстэ эрьва мезень тееме. Колмо иень перть роботась Армавирэнь суликань заводсо главной художникекс. Сон мазылгавтызе мозаикасо Чебоксаронь аэровокзалонть, Мордовэкспоцентрасо теинзе витражтнэнь. Те ероков художникесь роботы художественной творчествань эрьва кодамо лувсо: живописьсэ, графикасо, декоративно-прикладной искусствасо. 1971-це иестэ саезь сонзэ роботатнень кармасть невтеме республиканской, зональной, раськеютконь выстакатнесэ. Салдаевень произведениятне ванстовить Россиянь, Италиянь, Япониянь частной коллекциятнева. Весемезэ вете тёжадо ламо картинат артозь сонзэ кедьсэ. Портретт, пейзажт, натюрморт…ды ламо лият! Покш тарка сонзэ эрямосо саи преподавательской тевесь. Тенень сон алты ламо шка. Тонавтницянзо сакшныть мастерскоев: тесэ художникесь тонавты эйсэст весеменень, мезес тонадсь сонсь. Университетсэ тонавты «Художественная керамика», «Глиняное ды гипсомодельное литье» предметнэнь. Кецтни художникесь, што ламо ялганзо и сеть, конатнень марто вейсэ тонавтнесь, и сеть, кинь марто канды эрямованть художникень канстонть. Светлана Борисова, содавикс керамистэнть туртов те выставкась аволь васенце. Сон, кода и мирдезэ тонавты университетсэ. Вейсэндизеяк те кудораськенть керамикась. Сонзэ шкинемасо вейсэндявить неень шкань декоративной керамикасо кавто направленият- те живописесь ды скульптурась. Кода и ламот керамистнэ, сон а ашти вейке таркасо, свал вешни кодат бути од формат.