Содавикс учёноесь, Россиянь наукань заслуженной деятелесь Дмитрий Цыганкин тешксты 90 иень топодеманть! (Известный ученый, заслуженный деятель науки России Дмитрий Цыганкин отмечает 90-летие!) ЭРЗЯ

Сонзэ лемезэ содавикс масторонь келес, сонзэ важодеманзо совасть Мордовиянь  келень наукань сырнень фондс! Ожоковонь 22-це чистэ топодсть 90 иеть  учёноентень, Россиянь наукань заслуженной деятелентень  Дмитрий Цыганкиннэнь. Сон алтызе эрямонзо наукантень! Весе шканть перть сон топавтсь ды топавты покш важодема тиринь келень историянь, валтнэнь теемань тонавтомаст коряс, яви мель эрзянь кортавкстнэнь ванкшномантень. 1954-це иестэ  А.Полежаев лемсэ пединститутонь прядомадо мейле Дмитрий Цыганкин- эрзянь, рузонь келень ды литературань тонавтыця. Седе тов сонзэ учи аспирантура. 1962-це иестэ –Дмитрий Васильевич ашти покш тевень ушодкссо. Самай сестэ Мордовиясо панжозель М.Евсевьев лемсэ педагогической институтось. Лабораториятнень, кабинетнэнь, библиотекань пурнамось-теемась,  научно-педагогической кадратнень  вешнемась – весемесь мольсь Дмитрий Васильевичень вановтонзо ало. Содавикс финно-угроведэсь  кемекстась кеме сюлмавомат омбо масторонь учёнойтнень  марто, вети вейсэнь важодема течинь чис. Сон нолдась 200 ламо научной статьят, монографият, сон —  ВУЗнь ды школань туртов тонавтнемапелень ды программань автор. Свал явсь ды яви мель эрзянь келень тонавтомань стакачитненень. Анокстазь важодеманзо лововить покш питнечикс. Сынь максыть аёвтавишка лезэ сы шкань кельсодыйтнень туртов.  «Эрямось- наукасо! » — истя  республикань архивень важодицятне лемдизь учёноенть юбилеентень алтазь выставканть. Экспозициянтень пурназь лингвистэнть личной фондсто ламо материалт: фотографият, заметкат, статьят. Сонсь профессорось тешксты, чачома чинзэ васты паро мельсэ, кепетезь ёжосо. Видьксты, те датантень сех покш казнекс кармась улеме 2 монографиятнень нолдамось.