Скульпторось Николай Филатов теи В.Ромашкинэнь бюстонть. (ЭРЗЯ)

Таштамковонь 6-це чистэ раськень музыкань вечкицятнень тагояк Торамось тердьсы Кочкуровань ёнксонь Вирь ало Тавлав. Нама те покш тевентень молить анокстамот, мезде минь аволь весть ёвтнинек эсенек выпусктнэсэ. Течи пачтятано седе, кода моли роботась музыкантонть бюстонть лангсо. Лецтясынек, теи сонзэ содавикс скульпторось Николай Филатов. Сонзэ роботанзо мазылгавтыть республиканок, скульптуранзо аштить кода Саранскойсэ истя республикань районтнэсэяк. Маласо шкасто сонзэ кедьсэ теезь бюст карми Кочкуровань райононь Вирь ало Тавласо. Тевесь сеньсэ, што музыкантонть чачома чинтень этно-кудонть икеле карми полавтозь бюстось. Николай Филатов парсте содылизе музыкантонть, секс роботаськак моли шождасто. Теи сонзэ Николай Филатов цёранзо марто. Кавонест цёранзо мель явить скульптурантень. Александронь роботатне невтезельть Россиянь од ломанень выставкатнесэ. Сергей тонавтни Московсо, Строгановонь лемсэ академиясо. Роботамонь лувонть мельга совси ванномо Владимир Ромашкинэнь Андрей цёразо. Скульпторонть валонзо коряс, образось Андрейнень вечкеви. Кода и весе скульптуратнень теемадо икеле художникесь аноксты зярыя вариант. Улицятнень эйстэ скульпторось кочкизе тень.