Шокшань оршамопельденть. (ЭРЗЯ)
«Мордовия Мастеровая» республикань этнокультурной проектэнть лувсо ульнинек Теньгушевань буесэ, косо содавтовинек кедьчелькев ломантнень марто. Сынст эйстэ вейкесь эрямонь перть вансты, вельмевти шокшань оршамопеленть. Истят мастерицатнеде ней аволь пек ламо, секскак сон сеедьстэнь инже республикасонок ютавтовиця раськень шкинемань выставкатнесэ.
Мария Федоровна Кабаева, Теньгушева буень, Шокша велень эрицясь вансты кезэрень оршамопеленть. Умок ладязь коень коряс кудораськетнесэ оршамопельтне кадовсть сырькаест пельде одтнэнень, конат эсест ёндо умонсетнень лангс ванозь, стасть одт. Истя ванстовить викшнемань, мазылгавтомань койтне. Шокшань кезэрень оршамопелень башка ёнксос аштить пиле вакссо ашо мазыльматне, конат теевить мацеень пухсто. Кедьчелькев авантень эряви содамс аволь ансяк стамонь, викшнемань, кодамонь тевтнень. Эряви маштомс темс мазыльматненьгак. Кезэрень эрьгтнень, конат теезь човинька суликасто, Мария Кабаева вансты умок. Валонзо коряс, сонськак а соды, зяро тенст иеть, кадовсть сырькаенть пельде. Ней мазыльмань теемстэ тевс нолдавить човалятне, мазый тюсонь суретне. Кезэрень оршамопеленть васенцеде оршызе 1967-це иестэ ды те шкас вансты сонзэ. Эзизе мие сеть стака иетнестэяк, зярдо пек эрявольть ярмакт. Вансты оршамопеленть, лиясто сави кой-мезе полавтнемс, одкстомтомс. А сетнень, конатнень стынзе, викшнинзе сонсь, анок миемс. Ансяк рамицят пек арасть, а якить аватне кезэрень панарсо. Весе кемемась музейтнень, этнографической ансамблятнень лангс.
Мордовиясо улиця промыслатнень ютксо, стамонь, викшнемань тевесь ашти аволь меельце таркасо. А алкуксонь кедьчелькев мастерицятнеде аволь пек ламо.