Сех паро национальной пьесань коряс пелькстамо! (ЭРЗЯ)

Даволковонь 1 чистэ саезь эрзянь-мокшонь раськень драмань театрасо ушодовсь сех вадря пьесань сёрмадомань коряс пелькстамо. Ютавтови сон васенцеде ды арсеви те коенть поладомс кавто иес весть. Сонзэ вельде пелькстамонь ютавтыцятне арсить кастомс-кепетемс профессиональной театрань искусстванть, ливтемс лангс од сёрмадыцят, лездамс раськень драматургтнэнень. 2017-це иестэ раськень драмань театрань сценанть лангсо налксезельть 296 спектаклят, котатнень ваномо сакшность 37 тёжадо ламо ломанть. Театрань творческой коллективесь казсь ваныцятненень 5 од постановкат. Штобу седе товгак кенярдовтомс ваныцятнень од путовкссо, театрань прявтнэ састь мельс ютавтомс сех паро пьесанть коряс пелькстамо. Мереви кучомс сёрмадовкст, конатнесэ кармить ванстовомо ды кепетевеме эрзянь ды мокшонь кельтне. Сонзэ условиятнень коряс а мереви кучомс сеть сёрмадовкстнэнь, конат косояк ульнесть печатазь эли пелькстасть. Вейке авторонтень мереви кучомс колмо пьесадо аволь седе ламо. Пелькстамось карми молеме панжиковонь 5-це чис. Теде мейле тевест карми топавтомо жюрись. Весемезэ кармить 5 номинацият: эрямопингень, неень шкань, поэтической, фантастической ды эйкакшонь туртов пьесат. Весе номинациятнева карми вейке изниця. Авторось-изницясь максы эсензэ мелензэ пьесань публикацияс ды сценасо путомас. Лия пьесатне, шкань ютазь, истяжо кармить путовомо сцена лангсо. Изницятнень лемест сёрмадовить театрань сайтсэнть. Теде башка тосо жо карми сёрмадыцятнень туртов седе домка информациясь.

Рубрика

Комментарии

Комментариев нет.