Седиень лямбонц – иттненди. (МОКША)
Тяни аш стама рузонь школа, коса афольхть тонафнев мокшэрзянь кяльхне. Иднятне пара мяльса кочксихть содамошит эрь кодама тема лангс. Саранск ошень 24-це школаса шарфневи оцю мяль минценнети. Вов тяфта ушеткшнесы эрь уроконц учительницась Марина Мироновась. Васетькшни иднятнень мархта, тонафты эсост аф аньцек мокшень кяльть, культурать, мокшэрзянь крайть содама и кельгома, но и макссесы седиень лямбонц ня ёмлатненди, штоба синь касольхть пара тевонь тиенди ломанькс. Марина Николаевна школаса максси содамошит марнек кемзисемге киза. Кельгсы эсь тевонц, а тяфтома аш кода покодемс иднятнень мархта. Пинкне полафнихть, сяс учительсь тяфта жа аф ляткшни сонь эздонза. Од технологиятне кошордыхть покодемс лиякс, но сембе сяка, улема, мзярдовок и мезевок аф полафтсы учительть.
Сяда товга кармай ащема иттнень инголе и пачфни тейст аф содафть колга. Омба ширде, тячиень шить уленди, пади, сяда тёждя покодемс школаса. Сяс мес тифт сембе условиятне, ули коста сявомс сяда лама информация тя или тона темать лангс. Лездыхть учительть тевса мокшэрзянь кяльса лисенди идень журналхне. Шабатнень мархта молихть сяда инголи. Ваймось одкснеми, иднятнень сельмосна палыхть, ваномок эсь оцю ялгаснон лангс. 24-це школаса мокшень кяльсь вятеви омбоце и колмоце класснень эса. Иднятне лама национальностень, сембе пара мяльса тонафнесазь сонь. Шабатнень и синь тядяснон-аляснон инголе ащи кочкама, кодама кяльсь мокшеннесь или эрзяннесь сяда мялезост, сяда мала — сянь вельде и пуропнихть содамошит. И эрь урокти анокламань мяльхне-арьсематне учительть аф кадондсазь аф шить, аф веть. Кода сяда пачфтемс елматненди тя или тона темать, штоба синь курокста фатнелезь Марина Николаевнань азондоманц и лядоль енезост лама пингс. И учительсь путнесыне сембе вийнзон – путф цельхне и задачатне фалу сатневольхть.