Сарансо панжовсь Обществань пельде кирдемань штаб (эрзя)
Тесэ региононь эрьва эрицянтень мереви пачтямс лезэнь кандыця мельтнень-арсематнень, муемс теваревкстнэнь эрямос нолдамга превс путыцят ды теке марто — кирдема. Сергей Вдовин штабонь прявтось ёвтнесь: те таркась карми вейсэндямо эрьва-кодамо иесэ ломанть, конатне талныть масторонок ды региононок вандынь чинть кис, конатне арсить Мордовиянть социальной ды экономиканть ёндо касомадонть-кепедемадонть, тесэнь эрицятнень эрямонь паролгадомадонть. Штабось важоди ламо лувсо: тесэ улить таркат, косо мереви пачтямс эсь мельтнень-арсематнень, невтемс теварсевкстнэнь — течи те седеяк эрявикс тев: республикасонок топавтовить федеральной грантонь зярыя проектт. Артём Здунов ванызе Саранонь эйкакшонь художествань школатнень тонавтницятнень декоративно-прикладной шкинемань невтеманть. Ве нупальсэнть ютась специальной военной операциясо улицятнень туртов окопонь штатолонь анокстамонь мастер-класс, шабра нупальсэнть — ламо эйкакшонь триця кудораськетненень вейсэнь тренинг.
Эйкакштненень Республикань Прявтось казсь ламбамо казнеть. Татьяна Шукшина депутатонь советэнь прявтонть марто вастовомасонть Ольга Зубкова ламо эйкакшонь триця авась яволявтсь стакачиденть: Сарансо зярыя кудотнень вакссо арась эйкакшонь ютко шкань ютавтомань тарка. Истя жо тесэ ютась юнармеецтнэнь ды кадеттнэнь боевой действиянь ветерантнэнь марто вастовома. Региононь ветицясь пшкадсь од ломантненень, тешкстась: прявтокс течи — кирдемс информациянь каявоманть.
Вячеслав Басалаев Чечнянь кавто войнатнень ветеранось, мужествань кавто ордентнэнь кавалерэсь, «Отечестванть икеле заслугатнень кис 1-це степенень» орденэнь медальсэ казезесь ёвтнесь сэтьмечинь ванстомань органтнэсэ эсь киденть ды седе, мезень кис максозь неть покш наградатне. «Мезе истямось тиринь мастор?» кадеттнэнь пельде кевкстеманть лангс макссь каршо вал.
Александр Беляйкин ОМОН-онь ветеранось, Северэнь Кавказсо войнатнень ветеранось, «Отечестванть икеле заслугатнень кис 2-це степенень» орденэнь медальсэ казезесь пачтясь: СВО-с а молемс арасель мельгак. Александр Антипов, Рав чирень федеральной округонь правопорядкань войскань ветеранонь регионъютконь общественной вейсэндявксонь региононь куронь прявтось тешкстась: «Россиянь раськетне — изницят. Те чуди минек сантнэва, те моли пингеде пингес. Тыненк эряви ванстомс те коенть вандынь чинть кис».