Саранскойсэ ютась научной конференция, кона алтазель Мордовиясо кавто эрьгелемачитненень-те «Масторава» вейсэндявксонь 25 ды «Масторава» эпосонь 20 иень топодемантень ( В Саранске состоялась научная конференция, посвященная 25-ти летию общества «Масторава» и 20-ти летию эпоса «Масторава») ЭРЗЯ

Неть кавто покшчитнень вейсэндизь вейс. Пурнавозтнень ютксо сеть, кие ульнесь «Масторавань»  васенце съездсэнть, кие важодсь «Масторава» эпосонть лангсо, кие те шкас сонзэ тонавтни. Ламот састь те покшчинтень лия регионсто. Эрьгелемачинь васенце пелькссэнть кортамось мольсь эпосдонть. Васняяк вал максозель сетненень, кие важодсь сонзэ лангсо. Эпосонтень артовкстнэнь теинзе МР-нь народной художникесь Николай Макушкин. Поэтической ёндо витнизе-мазылгавтызе эпосонть Раиса Кемайкина. Малав пель иень перть топавтсь те тевенть. Эпосонтень васенце рецензиянть сермадызе профессорось Василий Демин. Промкссонть ульнесть Пензань ученойть, конат истяжо тонавтнить эпосонть, сермадыть мик монографият. Ламо лембе валт ёвтазельть се чистэнть эпосдонть. Эрьвась пурнавозтнень эйстэ лови сонзэ раськень сюпавчикс. Покшчинь омбоце пелькссэнть кортамось мольсь «Масторава» вейсэндявксстонть. Евгений Четвергов эсензэ кортамосо лецтизе, кода весе ушодовсь, кода савкшнось салава ютавтнемс вастовоматнень. Пурнавозтнень ютксо сеть, кие ульнесь вейсэндявксонь васенце съездсэнть. Ловнозель съездэнть уставозо, лецтязель, мезе вешсть республикань прявтнэнь пельде. Весэндявксос совицятне ламо кортасть Мордовиясо молиця тевтнеде, тиринь кельтнень тонавтомадост, культурань ванстомадо ды сюпалгавтомадо. Конференциясо ёвтазь  мельтне сёрмадозельть резолюцияс, кона карми витнезь ды домкалгавтозь. А сеть бажамотне ды вешематне, конат кепедезельть «Масторавань» васенце инекужосонть ды кортазельть неень конференциясо, седе товгак кармить совавтовомо эрямос.