Саранскоень территориальной лесничествань важодемадонть. (ЭРЗЯ)
Тундосто саезь сёксенть самс вирень ванстыцятнень лангс путови покш тев – пожартнэнь а нолдамось ды кирвазематнень каршо бороцямось. Те аволь ансяк эрицятнень мельга ваномась, штобу сынь топавтовольть вирьсэ улемстэ пожаронь а нолдамонь вешематнень, истяжо виртнесэ профилактикань мероприятиятнень ютавтомаськак. Саранскоень территориальной лесничествань прявт вирень ванстыцясь, Юрий Чикнайкин, пшкади весень туртов: «Бути нейтядо вирьсэ тол, сеске гайневтеде эрявикс службатнес эли лесничествас. Вирень толось седе куроксто мадстеви, зярдо ансяк ушодови». Покш толонь мадстемантень эрявить ламо вийть. А седеяк паро улевель, бути ломантне свал кирдевлизь мельсэст – кизэнь пси читнестэ а эряви кирвазтнемс тол вирьрьсэ. Зыян вирентень кандыть аволь ансяк пожартнэ. Кандыть виев варматнеяк. Истя, сехте покш зыян сынь кандокшность 2015-це иестэ. Сестэ ламо чувтт правтозельть Сыре Шайговань буесэ. Те иень виев вармадо мейле правтозь чувтотнень ламочись зярс а содави. Анокстазь «Кинь картат», конатнень лангс нежедезь, маласо читнестэ эряви ванномс виртнень. Ансяк мейле ёвтавить зыянонь объемтнэ, площадесь. Кода невти эрямось, виев варманть эйстэ прыть сэредиця ды сыре чувттнэ. Бути истямо кажос понгозь площадесь карми пек покш, сестэ чувтнэ озавтовить одс. Кода пачти интернетэсь, маласо шкасто регионсонок учови виев варма цярахман марто. Секскак вирень ванстыцятненень одс сави ардтнемс вирьга, ваномс улить-арасть правтозь чувтт.