Саранск ошсо ютась Эрзя-мокшонь раськень регионъютконь общественной вейсэндявксонь Исполкомонь заседаниясь. (ЭРЗЯ)
Исполкомс совицятне, конатнень ютксо РФ-нь регионтнэсэ улиця общественной организациянь ды национально-культурной автономиянь прявтт, кортызь зярыя талновтыця кевкстематнень. Ушодовсь заседаниясь мелень саиця тевстэ, эрзя-мокшонь раськень регионъютконь общественной вейсэндявксонть пельде Благодарность максозь «Сияжар» редакциянь шеф-редакторонь тевень топавтыцянтень Ольга Чернованень. Национальной школатнень ванстомадо ды кастомадо материалонь анокстамонь кисэ МР-нь образованиянь министерстванть пельде Благодарность явозь национальной вещаниянь программатнень ветицянтень Елена Полшкованень. Седе тов заседаниясь поладовсь регламентэнь коряс. Прявт темакс ульнесь Финнэнь-угрань раськень 7-це Конгрессэнть Мордовия республикань делегациянть роботазо. Отчёт тейсь эрзя-мокшонь раськень регионъютконь общественной вейсэндявксонь прявтось Юрий Мишанин. Целанек Конгрессэ роботамонть кисэ путозь покш питне. Исполкомс совицятне кортызь и государственной кельтнень ды раськень символиканть ошонть мазылгавтомсто тевс нолдамодо кевкстематнень. Истя, футболонь коряс масторлангонь чемпионатонтень брусчатканть стадиононть икеле арсить ацамс раськень тешкстнэнь мельс саезь. Седе сеедьстэ совавтомс куротнень, организациятнень, миема таркатнень лемс эрзянь ды мокшонь валтнэнь. Художественной промыслань ды сувенирной продукциянь миицятненень паряк эряви явомс кодаткак льготат. Исполкомонь прявтось ды общественной вейсэндявкстнэнь прявттнэ тешкстызь, кодамо покш робота минек раськенть ванстомасо теи Оренбургонь эрзя-мокшонь культурной центрась. Течинь чинтень сех талновтыця кевкстематне ульнесть тешкстазь ды совавтозь Исполкомонь Решенияс.