Саранск ошсо ютась эрзя-мокшонь раськень регионъютконь общественной вейсэндявксонь исполкомонь заседаниясь. (ЭРЗЯ)
Ушодовсь сон мелень саиця тевстэ. «За межнациональное согласие» медальсэ казизь Мордовиянь композиторонь вейсэндявксонь прявтонть Нина Кошелевань ды Отяжелесэ исполкомонь отделениянь правлениянь прявтонть Раиса Кузнецовань. Седе тов заседаниясь поладовсь регламентэнь коряс. Васенцекс кепедезель «Шумбрат» национально-фольклорной кенярксчинь ютавтомадо кевкстемась. Республикань районтнэсэ тиринь келень тонавтомадо кевкстемась вановсь Отяжелень ды Атюрьевань районтнэсэ молиця тевтнень коряс. Тенень заседаниясонть явозель ламо шка. Сех мелень саиця кармавтоматне ды пшкадематне совавтозь Исполкомонь решенияс. Таштамковсто Коми республикасо юты Россиянь финнэнь-угрань раськень 6-це Инекужось. Регионтнэстэ делегатнэнь квотатне уш евтазь. Мордовиянть пельде молить 10 ломанть. Делегацияс совицятне кемекстазельть заседаниясонть. Меельцекс яволявтозель — сундерьковсто Мордовиясо карми тешкставомо содавикс политической ды общественной деятеленть Г.Я Меркушкинэнь 100 иень топодемась. Те чинтень алтавить ламо мероприятият.