Саранск ошса панжевсь МФЦ-нь дополнительнай офис (мокша)
Тяни госуслугатнень ули кода получамс Юго-Западса торговай центраса. А нинге тяса покоди од ломаттненди площадка. Школаса тонафнихнень салсесы мяльснон «Тонкая материя» вастсь. Бизнесть социальнай эрявикс проекттнень мархта сотксненди питне макссь вице-премьерсь Наталья Таркаева.
МФЦ-нь дополнительнай офис панжевсь Гагаринонь куроса торговай центраса. Учреждениять путозь колмоце этажс. Государственнай и муниципальнай сяда ведьгемонь услугат максыхть 3 вастса. Тяниень пингть эвондась Президентонь кочкамать коряс заявлениянь максомась. Офисса ули терминал, штоба сёрмадфтомс пряцень электроннай очередьс. Стане жа тифт клиенттненди покодемаснонды кафта вастт. Мзярс оцюфне тяшнихть документтнень эса, шабатненди ули кода налхкомс или рисавамс. Учеви, што эрь шиня МФЦ-нь дополнительнай офисс кармайхть пшкядькшнема 50-60 ломатть. Китькстасаськ: госучреждениянь отделса ули эрявикс оборудованиясь. Рамаф сон торговай центрать азоронзон ярмакснон лангс. Тяфтама офист срхкави панжемс и Химмашса, и Светотехстройса. А «Тонкая материя» од ломанень вастсь покоди эрь недляшиня сяка жа торговай центрань кафеса. Школаса тонафнихне налхкихть налхкомаса, конатнень синць арьсесазь. Тяфта шабатне получайхть эрявикс навыкт.
Нинге фкя направления — содаф ломаттнень, психолокнень и медикнень мархта васедемат. Наталья Таркаевать тердезь примамс участия тяфтама форматса, коса макссь од ломаттнень кизефкснон лангс каршек валхт. Фкя кизефксса токазь стратегическяй инициативонь Агентствать од ломаттнень мархта регионцонк покодемать. Стане жа школаса тонафнихне и вице-премьерсь корхтасть туризмать, спортть квалма, макссть каршек вал «госслужащайть кодама эрявикс ширенза» кизефксс. «Тонкая материя» проектсь покоди ётай кизонь сентябрьста. Тя пингста вастти сашендсть пцтай 200 шабат.