Саранск ошень Некрасовонь лемса идень библиотекаса етась «Инжикс Роштувань кудов» илась (В детской библиотеке имени Некрасова г. Саранска состоялось мероприятие «В гости в Рождественский дом») МОКША

Саранск ошень Некрасовонь лемса идень библиотекась вяти оцю работа шабатнень мархта мокшэрзянь культурать ванфтоманц коряс. Ётафневихть эрь кодама илат, конатнень пингста иттне лувихть мокшень и эрзянь стихт, морайхть минцень моротнень эса. Цебярь кепотьксокс тянди арась «Инжикс Роштувань кудов» илась. Библиотекань покодихне сонь аноклазь Саранск ошень комсь кафксоце школань тонафнихнень и синь учительснон мархта.
Аф ваномок сянь лангс, што Роштувась ни ётась, илать пингста шабатне содазь, кода мокшэрзятне васьфнезь тя оцю праздникть. Илас сашендсть инжихть: «Ламзурь» и «Мокшаваня» фольклорнай ансамбльхне. Стихта и морода башка, иттне няфтезь калядамань койхнень. Тяфта жа тейст азондозь, кодапт ульсть сире койхне-обуцятне тя праздникста.